ကောင်မလေး အတွက် အပိုင်း1,2,3,4

အပိုင်း1

ကောင်မလေးရေ
မင်းနဲ့ငါ
မတော်တဆ
အပ်နှစ်စင်းဆုံခဲ့ရာ...
ငါ့ရင်ဘတ်ထဲ စူးနစ်ခဲ့ရပေါ့
မင်းပုံရိပ်..။

ရှည်လျား ပျော့ပြောင်း
ညိုရောင်ဖျော့ဖျော့ မင်းဆံနွယ်တွေ...၊
ကော့ညွတ်တဲ့ မျက်တောင်စိပ်စိပ်တွေကြားက
ယုံကြည်ချက်ပြည့်
တောက်ပကြည်လင်တဲ့
မင်းမျက်လုံးဝိုင်းတွေ...၊
ပန်းနုရောင် နှင်းဆီဖူးလို
ပွင့်မလို အာမလို
မင်းနှုတ်ခမ်းက စီးမျောလာတဲ့
သံစဉ်ချို စကားသံတွေ...၊
ငါ့အိပ်မက်တွေထဲထိ
အလည်လာလာနေရဲ့။

အချစ်ဆိုတာ
တစ်ကြိမ်တစ်ခါ တွေ့ရုံနဲ့
မဖြစ်နိုင်ပါဘူးလို့
ဘယ်သူပြောဝံ့သလဲ...။
ငါ့ဘက်ကတော့
တစ်ဖက်သတ်သေချာနေရဲ့။

ငါသွားတဲ့ နေရာတိုင်း
ကောင်မလေးရေ...
မင်းများ ရှိမလားလို့
ရှာလိုက်ရတာ မောလို့။

ငါပျော်တဲ့ အခါတိုင်းလည်း
မင်းကို မျှဝေချင်တယ်၊
ငါစိတ်ညစ်တဲ့ အခါတိုင်းလည်း
မင်းနဲ့ စကားပြောချင်တယ်။

ကောင်မလေး ရေ...
မင်းအတွက်ရည်ရွယ်
ရေးထားတဲ့ သီချင်းတွေလည်း များခဲ့ပြီပေါ့...
ငါ့အချစ်စစ်ခဲ့ရင်
တစ်ကြိမ်လောက်တော့ ပြန်တွေ့ပါရစေ။

အပိုင်း2

ကောင်မလေးရေ...

မင်းနဲ့ တွေ့ဆုံခြင်းကို

အိပ်မက်ပဲ ဖြစ်လိုက်စေချင်တယ်

ငါ့အတွက် အချစ်ဦးက

မင်းမဟုတ်တော့လို့ပါ။

အချစ်က ဘာလဲလို့

သေသေချာချာမသိခင်

ငါချစ်ခဲ့တယ်။

မင်းနဲ့တွေ့ချိန် နောက်ကျခဲ့တာက

ငါ့အပြစ်သက်သက်ပါ။

မယုံချင်ပေမယ့်လည်း

အချစ်က ပြောင်းလဲတတ်တာ

ငါကယုံလိုက်ပြီ။

ကောင်မလေးရေ..

မင်းနဲ့ကျမှ

ငါ့အချစ်စစ်ကို တွေ့လို့

ပေးဆပ်ခြင်းနဲ့လည်း

မရောင့်ရဲတဲ့ အဖြစ်မှာ

မင်းအချစ်တစ်ခုသာ

ငါက လိုတာပါ။

အပြစ်တင်ခြင်းများစွာကို

ခံယူဖို့ ဆုံးဖြတ်ခဲ့တာ

မင်းကိုချစ်ခြင်းရဲ့ အင်အားပါ။

ကောင်မလေးရေ..

အချစ်က အပြန်အလှန် စီးဆင်းတတ်တယ်ဆို

မင်းဆီက စီးဆင်းလာဖို့

မျှော်လင့်ပါရဲ့။

အိပ်မက်တွေ အတူမက်ဖို့

နှစ်ယောက်တည်းဆို လုံလောက်ပြီပဲ

ကောင်မလေးရေ..

ငါ့ရင်ခွင်ဆီမှာ ခြေစုံရပ်လိုက်ပါ။

အပိုင်း 3

မင်းရဲ့နူးညံမှုနဲ့ ငြိမ်သက်မှုက

ဖမ်းစားခဲ့တာပါ၊

ငါ့ကို အံသြစေတယ်၊

ငါ့ကို စိတ်ဝင်စားစေတယ်၊

မင်းစကားတစ်ခွန်းကြားရင်ပဲ

ငါ့မှာ ပျော်ရွှင်နေတယ်၊

မင်းမျက်လွှာတစ်ချက်အပင့်ကို မျှော်တယ်၊

မင်းအပြုံးတစ်ချက်မှာ ပျော်ဝင်တယ်။

ကောင်မလေးရေ..

ငါတော့ တဖြည်းဖြည်း

အခြေအနေဆိုးတော့မယ် ထင်ရဲ့။

ခဏတာတွေ့ဆုံမှု အဆုံးသတ်ရင်

တစ်ဘဝလုံးမတွေ့တော့မယ့် ဝေးခြင်းမျိုးနဲ့

ဝေးမယ်ဆိုတာလည်း သိရက်နဲ့

သူငယ်ချင်းထက် ပိုချင်မိတယ်။

မင်းနဲ့စကားလက်ဆုံကျလို့

ငါ့နေ့ရက်တွေ လှပနေရင်

မဖြစ်နိုင်မှန်းသိရက်နဲ့

တစ်သက်လုံးအတွက် စိတ်ကူးယဉ်ချင်မိတယ်။

ကောင်မလေးရေ...

မင်းနဲ့ငါက

မတူညီမှု တံတိုင်းအထပ်ထပ်နဲ့

မတူညီတဲ့ အိပ်မက်တွေ မက်ခဲ့သူတွေပါ။

ဘာသာချင်းခြားလို့

နိုင်ငံချင်း ဝေးလွန်းနေလည်း

ရင်ကို သိမ်မွေ့စွာတိုးဝင်တဲ့

အချစ်တစ်ခုအတွက်တော့

ပြောခွင့် ရှိပါရစေ။

ကောင်မလေးရေ..

လူချင်းဝေးရင်တောင်

နှလုံးသားချင်းတော့ နီးချင်ရဲ့

မင်းကြိုးစားပေးဖို့

ငါမျှော်လင့်ခွင့်ရှိပါရစေ။

အပိုင်း 4

ကောင်မလေးရေ
မင်းဟာ
ငါ့ စိတ်ကူးယဉ်တွေထဲက မိန်းကလေးလို
အပြစ်ကင်းတဲ့ အလှမျိုး မပိုင်ဆိုင်ဘူး၊
ပြီးပြည့်စုံတဲ့ အရည်အချင်းမျိုး မပိုင်ဆိုင်ဘူး၊
ငါ သဘောကျတဲ့ အရာတွေ အားလုံးလည်း
မင်းမှာ မရှိဘူး။
ငါ သဘောကျတဲ့ ပုံစံမျိုးလည်း
မင်း မဟုတ်ခဲ့ဘူး။

ဒါပေမယ့်လည်း
ကောင်မလေးရေ
ငါ့ ရင်ခုန်သံတွေတောင်
နရီ စည်းချက်ပျက်သွားအောင်
မင်း ပြုစားနိုင်ပါပေတယ်၊

ကောင်မလေးရေ
ထူးထူးခြားခြား ပေါ်လွင်တာ
မင်းမှာ ဘာတစ်ခုမှ မရှိပေမယ့်
အဲဒီ ရိုးသားမှုကိုပဲ
ငါက စိတ်ဝင်စားမိရဲ့။

သဘောကျမှုတွေကို
ငါ့ကိုယ်ငါ မသေချာတော့လို့
ရုန်းထွက်ခဲ့တာတွေ များများနေ၊
ကိုယ့်အချစ်ကို ကိုယ်တိုင်ပဲ
မယုံမကြည် ဖြစ်ဖြစ်နေတတ်တဲ့ သူမို့
ထင်ယောင်ထင်မှားတွေပဲလို့
စာရင်းထဲ မထည့်ချင်လည်း မရလောက်အောင်
ကောင်မလေးရေ
မင်းက ငါ့ အတွင်းစိတ်ထိ
နှောက်ယှက်လာနိုင်သူပါ။

ကောင်မလေးရေ
မင်းအသည်းနှလုံးကို
ပိုင်ရှင် ရှိနေမှာ စိုးတယ်၊
ဒါမှမဟုတ်
ဘယ်သူ့မှ မပေးဘူး ဆုံးဖြတ်ပြီး
သိမ်းဆည်း ထားမှာလည်း စိုးတယ်။

ကောင်မလေးရေ
မင်းက
အမြဲတမ်း လန်းနေမယ့်
ပန်းတစ်ပွင့်ဆိုလည်း
ငါ့ ဥယ်ာဥ္ထဲမွာပဲ
ပွင့်လန်းခွင့် ပေးစေချင်ရဲ့။

မင်း သိစေချင်ပါတယ်
မင်း အပြုံးပွင့်တွေ မြင်ရင်
ငါဘယ်လောက်ထိ ရင်ခုန်မိသလဲ ဆိုတာ...
မင်း ငါ့ကို ဂရုမစိုက်ပဲ
တစ်ခြားသူတွေကို ဂရုစိုက် ပြုံးရယ်ပြတဲ့အခါ
ငါ့ဘဝ တစ်ခုလုံး သွေ့ခြောက်သွားသလို
ခံစားလိုက်မိတယ် ဆိုတာ...
ကောင်မလေးရေ
ယုံချင်လည်း ယုံ
မယုံလည်း နေနိုင်ပါတယ်၊
ငါ့ အသည်းနှလုံးထဲမှာ
မင်းအကြောင်း အတွေးတွေပဲ
ပြည့်နှက်နေပြီ ဆိုတာ....။